जटिल सम्बन्धको कथा - 'लक्जम्वर्ग लक्जम्वर्ग'
गुड्दै गरेको कार्गो ट्रेनबाट फुत्तफुत्त बालकहरु फाल हान्दैछन् । ब्याग हुर्याउँदै ट्रेनबाट हामफालिरहेका उनीहरु स्कुल बंक गरेका विद्यार्थी हुन् । दुई जुम्ल्याहा दाजुभाइ पनि साथीहरुसँगै फाल हान्ने कोसिसमा देखिन्छन्, ट्रेनको पछाडिको ह्यान्डल समाएर सही समय पर्खँदैछन् । रातो रङको जर्सी पहिरेका कोला हुन् भने नीलो रङको जर्सीमा छेउतिर उभिएका छन्, वाश्या । सन् १९९८ तिरको युक्रेनको सहर लुब्नी पुर्याउने यो दृश्यसँगै पृष्ठभूमिमा कोलाको स्वरमा भ्वाइसओभर सुनिन्छ, 'मान्छेहरु भन्छन्-जुन छोरा आमाजस्तै देखिन्छ उ जन्मँदै खुशी हुन्छ । जुम्ल्याहा भए पनि वाश्या आमाजस्तै देखिन्छ, म बुवाजस्तै' !