रवीन्द्र समीरको नयाँ उपन्यास ‘पैसाको उडान’

अकल्पनीय रुपमा अर्बपति भएको कुवेर नामक नेता पैसाले खुसी, इज्जत, भोक, निद्रा, भावना, मुस्कान, आँसु जस्ता अभौतिक वस्तु किन्ने दौडमा आधारित यो उपन्यासमा उसको मानसिक विचलन उजागर गरिएको छ । सँगै राजनीति गरेको सुदामाको आदर्श जीवनलाई उपन्यासका हरेक कथामा सँगसँगै बुनिएको छ ।

उपन्यासमा पैसाको महत्त्व मात्र हैन, सीमितताबारे मार्मिक ढंगबाट लेखिएको छ । विज्ञान, प्रविधि र कृत्रिम बौद्धिकताको विकासले मानव सभ्यतामाथि के कस्तो प्रभाव पार्न सक्छ भन्ने आकलन पनि उपन्यासमा गरिएको छ ।

पैसाको लागि काकाकुल बनेको यो वैश्ययुगमा पैसाका आवश्यकता मात्र नभएर मृगतृष्णा भएको तथ्य सूक्ष्म ढंगबाट उजागर गरिएको छ । मुख्य पात्र कुवेर र सुदामाको वरिपरि लेखिएको यो उपन्यासमा ५६ च्याप्टर छन् । अत्यधिक पैसाले जीवनमा के कस्ता दुष्प्रभाव पार्दछ भन्ने कोणबाट यो उपन्यास पृथक् छ ।

शिखा बुक्सले प्रकाशन गरेको पैसाको उडानको मूल्य ३२५ छ ।