पेस्तोलसहित नेपाली युवा रक्सौलमा पक्राउ

पक्राउ पर्नेमा नवलपरासी गैंडाकोट निवासी २५ वर्षीय मनोज महर्जन रहेका छन् । एसएसबीका अनुसार महर्जनलाई दुई थान पेस्तोल र दुई थान म्यागजीनका साथ पक्राउ गरिएको हो ।

नवलपरासीकै विवेक मल्ल ठकुरी भने फरार भएको एसएसबीले जनाएको छ । मेड इन युएस र मेड इन जर्मनी लेखिएका दुईवटा पेस्ताले मध्ये एउटामा म्यागजिन लोड रहेको एसएसबीले जनाएको छ । दुईजना अपराधिक गतिविधीमा संलग्न व्यक्ति भारत प्रवेश गरेको विशेष सूचनाको आधारमा एसएसबीले जाँच गर्दा दुवै जना डंकन रोडतर्फ भागेका थिए ।

भाग्ने क्रममा उनीहरूले पेस्तोल र म्यागजिन झाडीमा फालेका थिए । महर्जनलाई पक्राउ गरिएपनि ठकुरी भाग्न सफल भएका एसएसबीले जनाएको छ । इन्सपेक्टर राजीव नन्दन सिन्हाका अनुसार उनीहरु हत्या, लुटपाट वा कुन प्रयोजनका लागि हतियारसहित भारत प्रवेश गरेको विषय हालसम्म यकिन भइसकेको छैन् । नेपाल प्रहरीसँग समन्वय गरि थप अनुसन्धान अगाडि बढाइएको छ ।