माटोको ढिस्कोले पुरिएर देउरानीको मृत्यु, जेठानी घाइते 

घर लिप्ने माटो खन्ने क्रममा ढिस्कोले पुरिएर रेसुंगा नगरपालिका १४ पराल्मीकी ५५ वर्षीया विष्णु रानाको मृत्यु भएको जिल्ला प्रहरी कार्यालय गुल्मीका प्रहरी निरीक्षक किरण सापकोटाले जानकारी दिए । सोही घटनामा ५५ वर्षीया हुमकला राना घाइते भएको प्रहरीले जनाएको छ । उनीहरुसहित ६ जना गाउँले माटो लिनका लागि चौराहास्थित माटोखानीमा पुगेको र माटो खन्ने क्रममा एक्कासी ढिस्को खसेर पुरिएका थिए ।

घाइतेलाई गुल्मी जिल्ला अस्पतालमा उपचारका लागि ल्याएकोमा विष्णुको मृत्यु भएको प्रहरी निरिक्षक सापकोटाले बताए । हुमकलाको भने उपचार भैरहेको बताइएको छ । मृतक विष्णु देउरानी र घाइते हुमकला जेठानी हुन् ।