डढेलोका कारण पाल्पामा तीन घर जलेर नष्ट

डढेलोले तीनधारेको डिल्लीराज पोखरेल, यज्ञ पोखरेल र बेदु पोखरेलको घर जलेको स्थानीय खुमप्रसाद पोखरेलले जानकारी दिए । यसैगरी टिकाराम पोखरेल, डिल्लीराज पराजुली, जुनकला पोखरेलको घर जोगाए पनि गोठ जलेको छ । स्थानीयका अनुसार ७ घर पूर्ण रुपमा जोखिममा छ । यहाँ झण्डै ३० घरको बस्ती छ ।

राती भएकाले डढेलो र आगोलागी निभाउन समस्या भएको छ । पाल्पा र अर्घाखाँचीको सीमा नजिकको बस्तीमा डढेलो निभाउन स्थानीय बासिन्दाले नसकेको छहराका पूर्ववडाध्यक्ष विष्णुप्रसाद पोखरेलले बताए । ‘केही समय नियन्त्रणमा आएको थियो,’ उनले भने, ‘हावाहुरीले पुनः डढेलो सुरु भएर भीषण रुप लिएको हो ।’