सुस्मिता ढकाल (नायिका/मोडल)

तपाईं 'मेरो भ्यालेन्टाइन'की नायिका, तपाईंको भ्यालेन्टाइनचाहिँ को नि ?

चलचित्र खेल्दैमा त्यसमा जस्तै प्रेम गर्नैपर्छ र ?

तैपनि प्रेमको अनुभव त होला ?

स्कुलदेखि नै मसँग प्रेम गर्न चाहनेहरू थिए, तर अहिलेसम्म मैले प्रेम गर्न चाहेको व्यक्ति फेला पारिसकेकी छैन।

'मेरो भ्यालेन्टाइन'मा तपाईंको नायक बाबु बोगटीले साँच्चैकै प्रेम प्रस्ताव राखे भने नि ?

यस्तो हुनै सक्दैन। पर्दामा जोडी भए पनि म उहाँलाई दाइ मान्छु।

कोसँग अभिनय गर्दा डर लाग्यो, निशा अधिकारी कि बाबु बोगटी ?

किन डराउने ? बरु मेरो पहिलो चलचित्र भएकाले दुवैले मलाई सिकाउनुभयो र आत्मविश्वास बढाउनुभयो।

'ओपन डेट' जानुपर्‍यो भने।

डेविड भिल्लासँग

आफ्नै ब्वाइफ्रेन्डसँग किन नभन्नुभएको ?

भए पो भन्नु। प्रेमको बाटो रोज्नुभन्दा करियर बन्ने बाटो रोज्नु मेरो लागि महत्वपूर्ण छ।

करियर त बन्यो नि, चलचित्रकी नायिका भै हाल्नुभयो ?

म अब चलचित्र खेल्दिनँ, संभवतः यो नै मेरो पहिलो र अन्तिम चलचित्र हुनेछ। ब्याचलर सेकेन्ड इयरको परीक्षापछि म फिल्म  स्टडिजका लागि अस्ट्रेलिया जाने तयारीमा छु। भविष्यमा चलचित्र निर्देशक बन्ने लक्ष्य लिएकी छु।

कसैगरी पहिलो चलचित्र सुपरहिट भयो भने नि ?

सुपरहिट त हुन्छ नै, तैपनि म अब चलचित्र खेल्दिनँ, बरु म्युजिक भिडियो खेल्छु।

तपाईंले जीवनमा गरेको सबैभन्दा ठूलो बदमासी ?

बदमासी गरिरहन्छु। ब्याचलर फस्ट इयरको फाइनल परीक्षाको एकदिन नेपालीको परीक्षा छाडेर हलमा चलचित्र हेर्न गएको  थिएँ। अहिलेसम्म घरमा कसैलाई थाहा छैन।

सबैभन्दा नराम्रो बानी ?

झगडालु छु। झनक्क रिस उठ्छ। एकपटक दाइले घर ढिलो आएकोमा गाली गरेपछि एक्वारियम नै फोडिदिएँ।

कसैलाई कुट्नुभएको छ ?

स्कुलको मनिटरले सर्ट बाहिर निकाली भनेर मेरो सर्ट काटिदियो, अनि उसलाई घरमै गएर हातपात गरेकी थिएँ।

मन नपर्ने सेलिब्रेटी ?

अभिषेक बच्चन

सेक्सी लाग्ने तीन स्वदेशी सेलिब्रेटी ?

कर्म, गौरव पहारी र सुगम पोखरेल

बिहान उठ्दा लिंग परिवर्तन भएर राम्रो युवक हुनुभएछ भने ?

हुनै सक्दैन, युनिभर्सल ट्रूथ हो कि म केटी हुँ र कहिल्यै केटा हुनेछैन। केटी भएर जन्मन पाएकोमा मलाई गर्व छ।

विवाहको पहिलो रात श्रीमान् समलिंगी भनेर थाहा पाउनुभयो भने ?

उसको विचारलाई सम्मान गर्दै उसँग असल मित्रको व्यवहार गर्थे।

चुम्बन कि सेक्स ?

अविवाहित युवतीलाई यस्तो 'टु मच पर्सनल' कुरा सोध्नुहुन्न भन्ने थाहा छैन ?

प्रचार/पृष्ठसंकेत/मूल्याङ्कन