दैलेख, भाद्र २५ - दैलेखको पूर्वमा माओवादीका एक सक्रिय कार्यकर्ताको हत्या भएको छ । रुम गाविस वडा नं २ का ५० वर्षीय थीरबहादुर बोहराको हत्या गरिएको हो ।

२३ गते विहान सात बजेतिर भैसीको उपचारको लागि घरबाट हिडेंको र भोलिपल्ट जनता माध्यमिक विद्यालयको कक्षा १ को कोठामा केतुकीको डोरीले झुण्ड्याइएको अवस्थामा फेला पारेको आफन्तले जानकारी दिएका छन् ।

जिल्लाबाट गएको प्रहरी टोलीले बोहराको शवलाई पोष्टमार्टमका लागि सदरमुकाम ल्याएको छ । मृतक बोहराको टाउकोमा चोट,रातो कपडा बेरिएको  र शरीरभरी नीलडाम देखिएको र झुण्ड्याईएको अवस्था हेर्दा हत्या गरिएको हुनसक्ने प्रहरीले प्रारम्भिक अनुमान गरेको छ ।

उनी जनयुद्ध कालदेखि नै नेकपा माओवादीका पूर्णकालिन कार्यकर्ता र शान्ति स्थापनापछि गाउँ कमिटीमा आवद्ध रहेका गाउँलेहरुले बताएका छन् । परिवारले भने द्धन्द्धकालकै रिसइबीले हत्या भएको आरोप लगाएका छन् ।

प्रकाशित मिति: २०६७ भाद्र २५ ०९:११