विराटनगर शीर्षस्थानमा
सहयोगी लिङ्कहरू
» एउटै पृष्ठबाट हाम्रा सबै इ-पेपरहरू पाउनुहोस् !
» हाम्रा चिरबिरे पारखीहरूका लागि !
» आफूलाई चाहिएको मितिको मात्र लेख/समाचार पाउनुहोस् !
» चाहिएको मिति/लेखक/वाक्यांश रोजी गर्नोहोस् लेख/समाचारको खोजी !
काठमाडौ, जेष्ठ १८ - डिफेन्डिङ च्याम्पियन काठमाडौंलाई पराजित गर्दै विराटनगर पेप्सी ट्वान्टी-ट्वान्टी राष्ट्रिय क्रिकेट लिगको शीर्ष स्थानमा उक्लेको छ । दुई खेलबाट ४ अंक जोडेको क्षेत्र नम्बर, १ विराटनगरले क्षेत्र नम्बर-३, काठमाडौंमाथि ४ रनको रोमाञ्चक जित दर्ता गर्यो ।
विराटनगरले दिएको १ सय १४ रनको लक्ष्य पछ्याएको काठमाडौंले नौ विकेट क्षतिमा १ सय ९ रनमात्र बनायो ।
काठमाडौंले १२ रन जोड्दा सुरुआती ३ विकेट गुमायो । परेश लोहनी ७ रन जोड्दा मञ्जित श्रेष्ठको बलमा एलबीडब्लूको सिकार बने । त्यस्तै, ४ रन जोडेका सञ्जय श्रेष्ठ सन्तोष बरालको हातबाट समातिए भने खाता नखोल्दै दीपेन्द्र चौधरी कट एन्ड बोल्ड भए ।
त्यसपछि कप्तान पारस खड्का र ज्ञानेन्द्र मल्लले ४९ रनको साझेदारी गर्दै टिमलाई केही उकासे । कप्तान पारसले ३१ तथा ज्ञानेन्द्रले १८ रन जोडे ।
काठमाडौं ६९ रन जोड्दा ५ विकेट गुमाएर दबाबमा थियो । तर रिकेश लामाले १३ र सुनम गौतमले २१ रन जोड्दै टिमलाई अघि बढाएका थिए ।
अन्तिम ओभरमा आवश्यक १० रन बनाउन नसकेपछि काठमाडौंले हार बेहोरेको थियो । विराटनगरका अजय राजवंशीले अन्तिम ओभरमा ६ रनमात्र खर्चे । अन्तिम ओभरको पहिलो बलमा सुनाम गौतमले छक्का प्रहार गरेपछि खेल रोमाञ्चक मोडमा पुगेको थियो । तर त्यसपछि काठमाडौंले सुनामको विकेट गुमायो भने कुनै रन जोड्न सकेन । विराटनगरका लागि 'प्लेयर अफ द म्याच' मञ्जितले चार विकेट लिए ।
यसअघि विराटनगरले ७ विकेट क्षतिमा १ सय १३ रन बनाएको थियो । उसका लागि अजय राजवंशीले ३२ तथा पुष्प थापाले २९ रन जोेडे । मञ्जितले १४ रनको योगदान दिए भने महबुब आलमले १० रन जोडे ।
अर्को खेलमा विनोद दासको अलराउन्ड प्रदर्शन मदतले क्षेत्र नम्बर-२, वीरगन्जले क्षेत्र नम्बर- ५, नेपालगन्जमाथि ४ विकेटको जित हात पार्यो ।
विजयी टिमका कप्तान विनोदले २ विकेट लिनुका साथै नटआउट ३२ रन जोडेका थिए । पहिले ब्याटिङ गरेको नेपालगन्जले १६ ओभर २ बलमा अलआउट हुँदै ८१ रनमात्र बनायो । उसका सन्दीप श्रेष्ठले १५ तथा रूपेश शर्माले १३ रन जोडे ।
वीरगन्जका लागि विनोदबाहेक, सञ्जम रेग्मी, राज मोहम्मद र राहुलप्रताप सिंहले दुई/दुई विकेट बाँडे ।
प्रत्युत्तरमा वीरगन्जले १७ ओभर ५ बलमा जित हात पार्यो । सामान्य सुरुआत गरेको वीरगन्जले २७ रन जोड्दा ४ विकेट गुमाएको थियो । तर विनोद र सञ्जमले ५३ रनको साझेदारी गर्दै टिमलाई जितनजिक पुर्याए ।
टिमले ८० रन जोड्दा सञ्जम व्यक्तिगत १४ रनमा आउट भए । त्यसपछि दुई रन जोड्न वीरगन्जले अर्को विकेट पनि गुमायो । विनोदले २२ बलमा ४ छक्का तथा एक चौका प्रहार गरे । नेपालगन्जका सन्दीप र निर्मल केसीले २/२ विकेट बाँडे । अब, मंगलबार भैरहवा र बैतडी तथा विराटनगर र वीरगन्जबीच खेल हुँदैछ ।
प्रकाशित मिति: २०६७ जेष्ठ १८ ०८:४१
तपाईंको प्रतिकृया