काठमाडौं, फाल्गुन २९ - प्रमुख सत्तारुढ दल एमालेले चित्त बुझ्दो काम नगरे मन्त्रीहरुलाई फिर्ता बोलाउन सक्ने जनाएको छ ।

केन्द्रीय कमिटीका निर्णय जानकारी दिन शनिबार पार्टी मुख्यालयमा आयोजना गरिएको पत्रकार सम्मेलनमा एमाले अध्यक्ष झलनाथ खनालले यस्तो बताएका हुन् । 'पार्टीको अनुशासन तोड्ने र चित्तबुझ्दो काम नगरे सरकारमा पठाइएका मन्त्रीहरुलाई फिर्ता बोलाउन सकिन्छ,' उनले भने ।

गृह राज्यमन्त्री रिजवान अन्सारीले पार्टी नीति बिपरित अभिव्यक्ति दिएकाले राजीनामा दिन लगाइएको खनालले बताए । 'एमाले अनुशासित पार्टी हो,' खनालले भने, 'उहाँ (गृह राज्यमन्त्री रिजवान अन्सारी) ले रिपोर्टर्स क्लवमा गएर पार्टी नीति बिपरित अभिव्यक्ति दिएकाले राजीनामा मागिएको हो ।'

गृहराज्यमन्त्री रिजवान अन्सारीले बुधबार दिउँसो आफ्नो पदबाट राजीनामा दिएका थिए । गृहमन्त्री भीम रावलले शान्ति सुरक्षा कायम गर्न नसकेको र आफूलाई काम गर्नसमेत नदिएको अभिव्यक्ति दिएपछि रिसाएका प्रधानमन्त्रीले गृह राज्यमन्त्रीलाई पद छाड्न दबाब दिएपछि उनले राजीनामा दिएका हुन् ।

प्रकाशित मिति: २०६६ फाल्गुन २९ ०६:५२