बिराटनगर, फाल्गुन २७ - अज्ञात समूहले गरेको गोली प्रहारबाट युथ फोर्सका मोरङ संयोजक परशुराम बस्नेत र उनका सहयोगी परशुराम राई घाइते भएका छन् ।

प्रहरीका अनुसार यहाँस्थित वडा न. १५ जनपथ टोलमा बिहीवार साँझ साँढे छ बजे स्प्लेण्डर मोटरसाइकलमा दुईको संख्यामा रहेको समूहले गोली चलाएको हो ।

बस्नेतको कम्मर र तीघ्रामा र राईको पिँडुलामा गोली लागेको छ । दुवैलाई उपचारार्थ न्यूरो अस्पतालमा भर्ना गरिएको छ । अक्सिजन दिन सुरु गरिएका बस्नेतको सघन र राईको आकस्मिक उपचार कक्षमा उपचार भइरहेको छ ।

दुवैको अवस्था बुझ्न अस्पतालमा भीड लागेको छ । एमाले मोरङ सचिव महेश रेग्मीले आक्रमणकारीलाई पक्राउ गरी कडा कारवाही गर्न सरकारसँग माग गरेका छन् ।

प्रकाशित मिति: २०६६ फाल्गुन २७ ०८:५१